Sögur, matur og sjávarþorp mætast á einstakan hátt í þessari heillandi dagsferð um Norðurstrandarleiðina í Skagafirði, þar sem blámi hafsins, tignarleg fjöll og ríkuleg matarmenning héraðsins leika aðalhlutverkið.

Ferðin hefst formlega fyrir utan Safnahúsið á Sauðárkróki, elsta hús bæjarins sem geymir dýrmæta sögu svæðisins. Þaðan er lagt af stað út með firðinum þar sem sögur af fornköppum, útilegumönnum og lífsbaráttunni við hafið fylgja okkur á leiðinni norður í hina ægifögru og snjóþungu sveit, Fljótin.

Áfangastaðurinn í Fljótunum er Brúnastaðir, en þar opnast nýr heimur fyrir matgæðinga. Á þessu metnaðarfulla fjölskyldubýli fáum við að kynnast lífinu í sveitinni og heyra sögur af búskapnum, en hápunktur heimsóknarinnar er kynning og smökkun á margverðlaunuðum gæðageitaostum og öðru handverksgóðgæti sem framleitt er á staðnum.

Eftir ljúfa dvöl og einstaka bragðupplifun á Brúnastöðum er haldið til baka og beygt inn í Unadal, þar sem hrikaleg fjöll ramma inn landslagið. Þar nærumst við á líkama og sál í hinu dásamlega Dalasetri, þar sem borinn er fram ljúffengur hádegisverður matreiddur úr héraðshráefni með skagfirska gestrisni í fyrirrúmi.

Að loknum hádegisverði liggur leiðin til Hofsóss, eins elsta verslunarstaðar landsins. Þetta fallega sjávarþorp iðar af sögu og sjarma og þar dveljum við í notalegu umhverfi. Við röltum um gamla bæinn niður við höfnina skoðum við gömlu timburhúsin, fræðumst um sögu Vesturfaranna, virðum fyrir okkur hina stórbrotnu stuðlabergshleðslu í fjörunni og njótum magnaðs útsýnis yfir fjörðinn, Drangey og Málmey.

Að loknum þessum viðburðaríka og notalega degi höldum við aftur inn á Sauðárkrók og snúum heim með kviðinn fullan af kræsingum, myndavélina fulla af minningum og hjartað ríkara af sögum og menningu Norðurstrandarleiðarinnar.